Allz daz guat vodar ünsar earde
Hattar lust zo kocha bahémme a gesùntz güatzle un hatt da huam lai a par öala, a tòkkle smaltz, a tatza milch un nicht åndarst? Azzar sait gånt zo venna di Giulia von Kastelé hattar sa allz daz sèll bodar nützt zo khocha eppaz asó guat ke 'z bar njånka rivan abezokhuala ke dar bartetz sa håm gèzzt. Ja, ombrómm von såntza 13 von höbiat a naügez geschèft boda hoazt "Natura in vasetto" hatt offegitånt atz Lavròu. In an uatzegez glesle izta quàse allz daz sèll boma nützt zo kocha an guatn turt un vil åndarz gesüasega. Ma nètt lai ditza: auzosoffa a guata pasta izta njånka mengl zo saltza 'z bazzar, allz iz sa boróatet. Di Giulia boróatet o marmelàde un gièzza untar öl, allz gimacht pitt daz guat vodar ünsar earde, süachante hèrta zo venna di pestn prodùkte, gimacht daz merarste atta Zimbar Hoachebene odar boda khemmen vodar ünsar provìntz. 'Z iz bichte azta djunge laütn azpe di Giulia gloam no ke in di khlumman lentla vodar ünsar provìntz, vo bo finn vor biane djar di laüt håm hèrta vortgimochtgian, di djungen mangen no machan a lem.
