Campagna: "Boschieres per delet, segureza da profescionist"
La Provinzia autonoma de Trent l'à lurà fora n codejel che à inom "Boschieres per delet, segureza da profescionist". Na curta lingia de la regoles de basa per la segureza canche se bat jù n èlber La relazions lurèdes fora da l’Osservatorie provinzièl su la desgrazies sul lurier e su la malatìes profescionèles met al luster che, tel setor del bosch, sozet n gran numer de desgrazies ence granes. N muie de chesta desgrazies les revèrda boschieres zenza gran esperienza, che laora tel bosch per besegnes privac, o aboncont no delaìte de na atività profescionèla. Chest vegn a esser na gran spenta per se dèr jù de più acioche vegne slarià fora informazions per chel che vèrda i risesc spezifics leé a la ativitèdes tel bosch e la precauzions da tor soraldut per chi che fèsc chesta ativitèdes fora dal contest profescionèl. Per chest, la Provinzia Autonoma de Trent l’à lurà fora n codejel che à inom “Boschier per delet, segureza da profescionist”. Chest no pel ge fèr front en dut e per dut a na formazion de basa fata coche carenea, ma l’é na sumèda de gran valuta de la regoles de basa per la segureza di operatores e di terc canche se bat jù piantes.
