Alle di laüt håm a stòrdja, un anìaglana stòrdja iz nètt gelàich in ar andarn. Baz par håm gelebet in ünsar stòrdja bart hèrta stian pitt üs un biar mang detzìdarn bibarz bölln kontàrn in epparùmmaz odar bibarz bölln haltn vorpórget.

Di kriminél boda inar bòtta håm gelebet in Siberia håm kontàrt soi stòrdja azpe ma impàitaten nètt: nützante in tatuàdjo. Un azta iz epparùmmaz bodasan boazt an hauf vo ditza, disar iz dar schraibar russo Nicolai Lilin, boda in soi lem, tatuàdje, hattar gemacht ploaze.

Dar schraibar Nicolai Lilin iz gebortet 'z djar 1980 in a stadt vodar altn Soviètunión. Sèmm hattar ågeheft zo macha tatuàdje soin tschelln no benn dar hatt gehatt acht djar un gianante vürsnen pinn djardar hattar hèrta vürgetrakk disa pasìong.

Lilin hatt nètt hèrta gehatt a schümmaz un dèstarz lem: dar iz khent augezüglt in an platz voll pitt kriminél un benn dar hatt kompìrt lai zbölf djar hattar gemocht nemmen toal pitt soi vatar un soine barba in a kriage boda iz auzgeprocht in soi redjóng, in di Transnistria. Soi lem in disa redjóng iz o kontàrt in soi gekhennate libar Educazione Siberiana; an libar boda, benn dar iz auzgånt, hatt gevàllt ploazan laüt un asó spetar izta khent gemacht a film o.

In film Educazione Siberiana makma vorstìan bi bichte 'z iz di traditzióng von tatuàdjo vor 'z volk von Nicolai. Azpe 'z khinnta khött in disan film, vor di laüt boda lem in di sèlln plètz, a mentsch boda macht tatuàdje iz azpe a faff; imen mochsten kontàrn bazto hast getånt vo guatz un vo letzez, un asó, er bart detzìdarn belar disénjo zo macha. 'Z iz a migele azpe gianse zo paichta.

Dar schraibar hatt nètt geschribet lai disan libar, ma vil åndre o. In umman vo dise, boda hoazt Storie sulla pelle, spiegàrtar o ke dar tatuàdjo iz azpe a zung boma mage nützan zo kontàra eppaz, di zaichen atti haut khön bazta iz vürkhent in lem von an mentsch: alle di strich, di nümmar un di börtar boda khemmen gemacht bölln munen eppaz.

A sachan boda iz pròpio bichte vor in Nicolai iz ke ma mocht hèrta khennen un vorstìan in sinn von an tatuàdjo vor ma detzìdart zo machanen, ombrómm 'z iz nètt lai eppaz boma macht z'soina schümma. Vil laüt però pensàrnda nètt drau att dise sachandar. Defàtti dar schraibar khütt o ke, haützotage, vil gekhennate djunge boda spiln in palù håm zerte tatuàdje Maori, boda inar bòtta soin khent gemacht in diarnen vodar Polinesia benn sa soin gekresart un khent baibar. Dise disenje håm gemunt ke di diarnen soin gest raif zo maga håm khindar. Di djungen però ditza bizzanz nètt; vil laüt schaung å lai bida a tatuàdjo iz schümma odar nètt, åna zo giana z'sega bidar hatt an sinn.

Dar Nicolai alóra khütt hèrta ke ma mocht stian au pinn oarn benn ma macht an tatuàdjo ombrómm, azpe 'z khütta an altar spruch siberiano, "Ben 'z hirn pensàrt nètt, dar laip gehöartzsan". (E.v.K.)