Intorno al paese, sopra verso i Baiti e lo Sbånt, e sotto, verso la Valdastico, si vedono ancora i muretti in pietra a secco che hanno permesso alla nostra gente di coltivare la terra, realizzando i campi sui terrazzamenti, nonostante l’elevata pendenza del nostro territorio.

Ogni famiglia aveva almeno un campo di patate e le patate erano il cibo principale per ogni ricetta.

Piatti semplici ma diversificati perché le patate si abbinano proprio a tutto.

Atz Lusérn, balde pinn gest khlumma i, ka herbest hattma gesek alle di laüt von lånt auz pa èkhar zo lesa au di patàtn un biar khindar o håm gehatt ünsarn kòmpito: balsa soin gest auzgehauget vodar earde, habarse zuargedjukht in haüfla, auzzornìrante di groazan boma hatt gèzzt, di mezònatn von såm un di khlumman vor ’z sboi. Anìaglana famìldja, in di sèlln zaitn, hatt gehatt èkhar zo setza patàtn un khabaz, un a sboi boda iz khennt augemacht in ditzémbre.

Di laüt håm gehatt patàtn daz gåntz djar un darmìt håmsa gemacht njòkkn, korséntzan, da håmse geröastet un asó nå hattz parìrt z’èzza hèrta eppaz åndarz, biz ånka lai soinz gest hèrta patàtn.

Daz sèll bode hån gehatt liabar però iz gest da patàtana pult pittn kavrìtz. Da sèll hattze hèrta gemacht moi tatta, ombrómm ma hattze gemocht mischan a gåntza baila, in khezzl aftn heart un er hatt gehatt patziénza zo tüanaz un hatt gehatt gearn di hitz von vaür.

Er hattze gemacht asó. Dar hatt geschelt di patàtn un hattze gesotet in bazzar, sovl genùmma zo dekhase, pittnan henfele saltz. Balsa soin gest gekhocht, hattarse gesmökket pittn smökkar (un da moi khinn vorstmar bazzar hatt getånt), dena hattar drinngedjukht a håmpfl boatzamel un, pittn pultnstèkh, hattarse gemischt, odar pezzar beratz khön ke dar hattze gekheart, ombrómm dar hattze gevånkh von pon von khezzl zo traga da untar, obar, un da obar, untar, sin azze hatt gehatt schümma di rintn umme in khezzel un hatt neméar gehenk. Est hattarse gedjukht aftz pultnlukh.

Antånto moi måmma hatt gekhocht in kavrìtz, an baizan sugo pittar lugånega. Pittnar lugånega habar gèzzt alle sèkse, alóra saibar gest sovl in haus. Si hatt brustolàrt zboa schümmane håmpfln boatzamel in a fånn pitt a pizzle smaltz, dena hattze gedjukht a pizzle bazzar zoa azta dar sugo nètt sai kartza dikh, hatt drinn gelèkk di lugånega augehakht in tökkla un hattze gelazzt khochan an ur.

Anìaglana bòtta bobar håm gèzzt patàtana pult un kavrìtz, üs khindar hattzaz parìrt vairta. Un in tage vodar sagra vo Santa Giustina, ditza geèzza hatt nia gemenglt.

(n.g.)