Azpe alle djar haür o, balda heft å dar ditzémbre, tüanda offe di mercatini vo Boinichtn.

Disa traditzióng hatt a långa stòrdja un haüt billezaz kontàrn.

Di mercatini vo Boinichtn soin gibortet in Taütschlånt, vor mearar baz sèkshundart djar un dar earst mercatino boda hatt offegitånt iz dar sèll vo Dresda, hèrta in da sèll zait sèmm. Di artidjé håm vorkhoaft daz sèll bo sa håm gimacht ma, visto ke ’z iz gest abaståntza taür, håmda gimak gian lai di raichan. Pinn djar però hèrta mearar laüt håm ågiheft zo giana z’sega dise bankéttn un est mangsa gian un khoavan alle.

Vo di noüntzegar djar vort disa traditzióng hatt ågiheft zo khemma hèrta mearar bichte un zo khemma gimacht in da gåntz Euròpa. Ummandar von gröazarstn un mearar gisek von Beleschlånt, iz sichar dar sèll vo Poatzan. Lebante da, alle di djar apéna ’z tüanda offe di bankéttn sige tausankhar laüt gianse z’sega alle di tang. Vor mi dise bankéttn soinz nicht vo particolare, umbrómm i sise alle di djar. ’Z soinda laüt boda khemmen sinamài vo züntrest in Beleschlånt odar von auslånt. Attn mercatino makma vennen alla dar sòrt: menndla von presèpe gimacht pitt holtz, franéln pitt boll håntgimacht un bazta nètt mage mengln iz ’z gièzza un ’z getrinkha, von brezel pitt drinn in barm spèk, di strauben un sichar in vin brulè un in barm öpflsaft. Dar brezel iz a proat boda khint von Taütschlånt un iz gikhent vo alln boma redet taütsch, quindi in Taütschlånt, Österreich, Swissera un in Südtirol. ’Z hatt di form vonan ring drinn pittnan khnopf. Zo vånga disa form dar pekh mocht machan an bahémmegan movimento, mindar baz an secondo. Dar brezel auzzalt iz tunkhl, però inzzalt izzar liachte. Ditza iz umbrómm, zo machanen khemmen asó tunkhl auzzalt, vor dar khint gikhocht in pachovan khintar gilekk vor khurtza zait in a soda (odar in bicarbonato). Ma khött ke sa soin khent gimacht da earst bòtta in an convento vo frarn pinn avåntzi vo proat un ke di form rappresentàrt di arm von frar boda iz nå zo peta.

Di strauben invétze soinz a gesüasega boda khint geröastet un boda khint gemacht in Bayern un in Tiról. Dar impasto iz circa dar sèll von ambléttn solo ke, benn sa khemmen geröastet in barm öl, khemmensa gimövart un gedrent zoa azza vången di form vo vil khlummane bürmla. Dar nåm infàtti, khint von taütsch Straub un hoast gazèr.

Secondo miar di mercatini soinz eppaz schümmaz z’sega un zo stiana pittnåndar o, però balda soin sovl turìstn makmase neméar mövarn in di statt un alóra iz kartza vil.

An gruaz,

Samuel Pedrazza