Azze mochat nemparn in anìaglan månat vo disan djar 2020 a pild, vor in djenàro zornìrate “La Vergine delle rocce”, umbrómm an mitta earst von hochnach - djenàro vairtma “Da Hailige Maria Muatar vo Gottarhear”, un darzùar in tage vodar patze o, an menta sèkse vairtma Gottarhear bodase macht khennen vorå alln in völk vodar bèlt, un an sunta zbölve vairtma “Di toaf vo Gesù.” ’Z djar 2019 izzese gespèrrt pitt ploaze auzlégom zo gedénkha di 500 djar vo Leonardo da Vinci. Vo disar zait zo gedenkha disan vèrbar, djüsto vorgånt di Boinichtn, pan naüge djar izzmar gestånt in hirn ditza pild. Asó dar groaz vèrbar in ditza pild, versióng boda iz in Louvre a Parigi, hatt auzgezoget vonar bèlt vo krötz un in a strenga prospektìva di laüt gevèrbet in a piråmide. Attn mustàtz vodar Madånna, von Kristkhinn, von khlumma Giovanni Battista un von engl izta eppaz vo timpl un naturàl asó azpe in laip, sovl azzase mövratn alle panåndar in disan khlumma un groaz platz. Zöbrest attn spitz vodar piråmide di Madånna, iz gehöachart ma si pükhtze pinn khopf azpe “Muatar vo Gottarhear”, gerüaft asó pinn dogma von Concilio vo Efeso (431). Si schauget abebart, un nor abebart sekma soi gepümblate tschenkh hånt sovl bise böllat schoanen di sèlln untar. Alle di hent vo disan figùrn parìratz ke sa mövarnse, zo zoaga odar zo lirna epparéppaz. Azpe ’z khönda di Vangeli canonici, dar G. Battista in soi djüngom izzese nia getrofft pitt Gesù. Berda hatt geschafft ’z pild, hatt geböllt azta ’z Kristkhinn baige in sèll boda berat khennt soi prekursór. Ditza berat auzgevallt schiar 30 djar darnå, baldaren hatt getoaft inn in bazzar von fluzz Giordano. Di laipla von khindar soin asó schümma gepolstart un soin eppaz vorvür zoa zo magase åschaung in di oang, azpe di khindar alùmma khånen tüan. “Du ai ka miar, ke i khimm ka diar”. Obar da offege un fùrse kartza groaz hånt vodar Madånna, da åndar boda vürschupft ’z khinn; untar tortemìtt izta da sèll von engl, un hèrta abe geràde izta ’z Kristkhinn boda baiget. Baz gittaraz zo pensàra dar engl umgedrent boda schauget a migele zuar üs, un lirnt pinn vingar eppaz tortemìtt? Da glentzege snur umme in laip vodar Vergine? Habante gekhennt er anìaglan såm un gresle, auvar vodar earde hattar gevèrbet gresar boda håm gelebet in di sèlln zaitn. Tiavrante ’z oage izta eppaz bodaz trakk zuar an stoll, nètt gemacht vo hånt vo månn. Un daz betarste, vort von ünsar oage prichta durch a bèlt vo schatn vo kròtz, züntrest a liacht boda er alùmma hatt gehatt in soi khopf un in soi seal. Vor üs ditza gevèrba bart stian hèrta eppaz zo plöaza, asó beråndre baibar un månnen in di zaitn bartn nia soin guat “zo lesaz in gåntz”. (A.G.)