Di hoachebene vo Lusérn iz a platz boda auz pan summar makma gian zo macha zboa tritt in di ünsarn schümman beldarn vo tånnen, lèrch un puachan, odar zo giana in pa Vesandarn. Ka herbest anvétze di laüt da ka üs mang schaung di tausankh varm boda håm di löapar von puachan, augemischt drinn in tunkl grümma von tånnen, un mang o gian na sbemm in di beldar. Auz pan bintar da in lånt a sachan boma mage tüan, iz daz sèll zo giana pinn skin. Lusérn pitt Lavròu hatt 30 km piste pitt 8 impiånti zo giana au.

Di piste da ka üs soin dèstar, gemacht zoa azta mang gian alle di famìldje pinn khindarn zo raita; lai di Laghetto un di Ust soin gemacht vor di sèllnen boda soin guat zo raita gerècht. Ma bela stòrdja håmsa di piste vo Lusérn? Vor da hatt offegetånt di Lait hattma geraitet in di bisan au kan Hüttn, un abe pa dar bis von Möar, ma hatten gemocht mèkkn in snea alùmma pinn skin. Di earstn piste soin khent augemacht in di djar sèchtzekh inn in di Lait: a khlummana vor di khindar, un a groaza mearar stikhl un lengar sèmm nåmp. Di piste soin gest gemacht sèmm umbrómm ’z iz a platz boda vånk biane sunn un iz kheltar baz di åndarn saitn. ’Z izta zo khöda ke inar bòtta soinda nètt gest di kanü zo macha in snea un vor ditza di laüt soin gest mearar ågepuntet zo süacha plètz boda dar snea hatt gehaltet mearar. Di earstn djar inn in di Lait hattma gemoch mèkkn in snea pinn skin un ditza iz khent getånt von djungen vo Lusérn. In di djar achtzekh izta khent gemacht a naüga pista boda hoazt Avez del Prinzep, disa heft å au attn Virgo Maria un rift nidar a Laghetto, ke haützotage iz da lengarste un stikhlarste vodar gåntzan hoachebene.

Vor zen djar soinda khent gemacht zboa naüge piste: da sèll von Tordjù un da sèll bodase åhenk pittar Laghetto un geat von Virgo Maria zuar in Vesan. Bidar in di djar achtzekh dar snea iz hèrta gest mindar pan bintar un asó håmsa gemacht au zöbrest dar Lait a groaza hülbe boda khint ågevüllt pinn bazzar zo maga machan snea pan bintar in di khaltn tang. Speràrbar azta eppaz vürkhemm in khopf von laüt vodar gåntzan bèlt, zo haba mearar ka hèrtz di beldarn un allz bazzen någeat, asó furse makma machan khearn bidrùmm di zait boma hatt gemak raitn attn snea gevàllt von hümbl. ’Z izta o zo khöda ke di hoachebene vo Lusérn pan bintar hatt an schümman platz zo giana pinn ennegen skin, ’z soinda schümmane khearn zo maga machan, boda gian vo Milegrùam in di Vesandarn, inn in Kostesì un durch zuar Slege. Un azzaraz vörtet zo giana pinn skin di ünsar saitn soinz di pèstn zo maga tritzln pinn snearoaf. Ditza iz allz bazzaz mage khön, i paitaz alle in ünsar lånt.