Anìaglana Istitutzióng, z’arbata gerécht, mocht rendarn kunt vo daz sèll bose tüat un auzlüsnen bazta håm zo khöda di laüt boda håm zo tüana pitt irn; vorstìan, vor anìaglan prodjèkht bose vürtrakk, bida iz gånt allz azpe ’z hatt gehatt zo giana, odar bida iz eppaz zo pezzra odar zo bèksla. Lai tüanante asó makma soin sichar z’arbata gerécht.

Vor ditza un o umbrómm ’z iz geschribet in Statùt, dar Kultùrinstitut Lusérn, vo hèrta, a bòtta atz djar, vinntze pitt soin laüt un pitt alln in rapresentént boda håm lust zuarzokhemma. Un asó haür o, atz 21 von Kristmånat, dar Kultùrinstitut hatt hergerichtet in Lusérnar Boinichtn. A bichtegar momént, nètt lai zo “rendra kunt un auzolesa naüge idèe”, a momént zo pinta hèrta mearar di lusérnar pitt soin Institùt.

Dar Vorsìtzar Gianni Nicolussi Zaiga un di direktören Anna Maria Trenti Kaufman, håm gedenkht di bichtegarstn prodjèkhte vürgetrakk auz pa djar 2019; fra dise dar prodjèkht ADOC, a didjitàl arkìv vo foto, interviù, un dokuméntn. Sa håm gedénkht o ke ’z iz sa mearar baz a djar boda TVA Vicenza zoaget in ünsar tageschàu Zimbar Earde in da gåntz provìntz vo Vicenza. ’Z soinda khennt augeroatet di naüng “speciali” boda gian att TML. Un gåntz khurtz soinda khennt augeroatet prodjèkhte azpe da “Zimbar Kolònia” boda ditza djar hatt gesek nemmen toal 42 khindar; dar “Summar Khindargart”, di “Zimbar Kürs” un di kürs vo taütsch, odar dar kalandàrdjo 2020 boda bart rivan in alle di haüsar. Ma, ma hatt nètt lai augeroatet bazta iz khennt getånt, ’z izta khennt khött o bazta bill vürtrang vo naügez dar Kultùrinstitut auz pa djar 2020; mearare di prodjèkhte, un fra dise an DVD vo kantzü gemacht vodar aktören Maria Roveran.

Mearare “hoache” håm geredet gedenkhante bi bichte ’z izta di arbat boda vürtrakk dar Kultùrinstitut zoa azta d’ünsar zung un kultùr mage håm no a långez lem. ’Z izta o khennt gedenkht ke di famìldje: tatta, måmme un non, mochatn hèrta ren, pitt alln in djungen, azpe biar; lai asó allz daz sèll boda tüat dar Kultùrinstitut mage håm bèrt. Azpe alle djar soinda gest di “Zimbar prüadar” von Simm un Draitza Kamoüdar un, azpe alle djar, allz iz gerift pittnan schümman momènt: a fladl panetù, a tètzle guatn boi, un a drai börtat pittnåndar. (E.v.K.)