Ai 8 de mèrz, per endrez del Rotary Club de Fiem e Fascia vidà dal president Antone Pollam, te La Gran Ciasa de Soraga vegn endrezà na sera con l’antropologh David Bellatalla per portèr dant la storia di Tsaatan, i omegn rena de la Mongolia, la veiora comunità de raiseres de chel raion.

Bellatalla, nasciù a La Spezia, l’é dozent a la University of Western Australia e enrescidor a l’Academia de la Scienzes de la Mongolia, autor de monografìes sul sciamaneisem e da egn empegnà te scomenzadives umanitères ti lesc più purec de chest raion.

Chest studious l’é l’ideator del projet SOS Taiganà, metù a jir en colaborazion con la Crousc Checena de la Mongolia, che anter l 1996 e l 2003 à evità che l popul de la renes more fora per na epidemìa che copèa renes e ence persones. Na comunità entrìa risièa de vegnir descancelà da nosc pianet e a la fin del program, jit inant per 7 egn e che en dut l’à costà tanche n Suv, chest popul aea podù recuperèr sia condizion de auto sufizienza leèda a l’arlevament de chesta besties.

Chest projet ge à fat vadagnèr la Crousc d’arjent da pèrt de la Crousc Checena de la Mongolia. A Soraga l’enrescidor portarà dant ence sia azion umanitèra al ben de la femenes e di bec arbandoné de Ulan Bator, che l’à inom “Ulan Bator - Una Ger per Tutti” (la Ger l’é la tenda tradizionèla de la popolazion raisera mongola) e la se met dant de didèr bezes-mères e families puretes de la capitala, olache vif bec e gregn pedimenté o con patologìes pesoches zenza assistenza sanitèra e economica. Chesta atività nasc dò aer realisà del 2000 n documentèr ensema con Dino de Toffol per uzèr fora la condizion de degradazion de n muie de bec che per sciampèr al clima freit troa refuge sot tera, sfodegan tel refudam per chierir zeche da magnèr.

L’apuntament l’é en jebia ai 8 de mèrz da mesa les 9 da sera (20.30) te la Gran Ciasa de Soraga.