Vil laüt khön ke an stroach bosa khemmen atz Lusérn böllatnsa neméar vortgian. Da ka üs gevàlltz pròpio alln, in laüt boda khemmen vo vort, in laüt boda soin gebortet da un est lem vort, in laüt boda khemmen pan bintar zo raita un in sèlln boda khemmen pan summar o. Pròpio asó, Lusérn auz pa djar, daz meararste vo allz ka herbest iz hèrta ler. Durånte dar boch, von herbestmånat/setémbre vort, soinda lai di djungen boda gian ka schual un di laüt boda lem da daz gåntz djar odar khemmen lai z’arbata.

Di laüt khemmen di solito di såntzta un di sunta fin azta iz verte dar månat vo bimmat/otóbre, fin in tage von toatn, dòpo khinta quasi neméar niamat in gåntz bintmånat/novembre. ’Z lem da atz Lusérn in di sèlln zaitn iz allz monotono un a pizzle traure. Ma geat ka schual odar atti arbat, kheart bidrùmm da huam, geat z’slava un bidar gelàich di gåntzan tang.

I però bèkslat nicht vo allz ditza, sichar ’z berat pezzar azta durånte ’z djar o beratnda moine tschelln, ma ditza iz Lusérn un asó o gevàlltzmar. Ka herbest geatma ummar pa beldar, ma sek tausankh varm, di löapar boda valln, di kapardjöln boda khemmen auz in di bisan zo vrèzza daz lest vrischez grass in di rue. Pan bintar makma gian zo raita di gåntzan tang, nidar un au pan ünsarn schümman piste, fermàrnse zo trinkha eppaz barm un bidar partìrn.

Dòpo khinta dar Martzo, boma vairt ke ’z izta bidar nå zo khemma dar långez. ’Z heft bidar å zo macha barm, ma mak gian auz ena rock un di tang hevan å zo khemma lengar. ’Z iz schümma mang bidar auzgian abas zo macha a khear balda no iz a pizzle liacht fin au atz Kraütz odar au atti Ris.

Un èkko ke ’z iz lai summar, di laüt khearn bidrùmm, di sunn iz bidar hoach in hümbl, di tang soin lengar un allz parìrt mearar luste un bidar lente.