Ånka azta appàra bòtta daz sèll boda kontàrn di altn magat auzseng hèrta daz gelàich un auz vodar zait, i gloabe ke ’z berat pezzar lüsanse gerècht un lirnen daz mearaste boma mage anvétze baz zo lachada drau un haltnda nètt kunt. Vor ditza in moi earst artìkl böllate kontàrn eppaz boda, azpe a fotografia, macht seng ’z geléba vonar bòtta. ’Z iz nicht åndarst baz ummana von stòrdje vo misèrdja bodamar hatt kontàrt moi nona in alla disa zait.

Dòpo in earst djar vo elementari, benn si hatt gehatt sèks djar un di schual iz gerift zo lazza platz in summar, in soi khopf izta nètt gest platz vor in spazz, die spildar un di tschelln. Si hatt gebizzt gerècht ke ånka azze iz gest khlumma hebatze gehatt zo geba a hånt soin laüt. Dar mestìaro bozar håm gètt iz gest dar sèll zo stiana nå in khüa atti etzan vor in bakå. Vo soin börtar hattma lai vorstånt ke daz sèll bodar hatt gètt mearar fastìdio iz nètt gest di arbat ma ke si hatt gehatt zo stiana alùmma.

Soi sbestar o hatt gehatt da gelàich arbat ma si iz gest, azma mak khön asó, mearar gelükht umbrómm sa håmar gehatt gètt die etzan von Milegrùam, un sèmm soinda gest laüt un khindar. Moi nona anvétze iz gest in oro von etzan, boda niamat di solito hatt gelekk vuaz. ’Z izmar alóra khent spontaneo vorsanar bia si hatt getribet di zait, ma soi risposta iz nètt gest pròpio pegàistart, semplicemente di zait iz nètt pasàrt. Si iz gestånt sèmm, stille azpe bazzar in a hülbe, un azpe in a hülbe ånka a khlumma khnöttle mak mövarn vil sachandarn allz daz sèll boda iz sutzédart hatt gemacht in si an groazan interesse, ma di solito izta gest biane odar nicht vo naüge odar interessånte.

Ma dar lòun però iz nètt gest soi uantzege problema, di vichar boda loavan vort, boda pasàrn di konfìn un etzan balz renk o; un allz ditza iz gest atti aksln von an khinn, boda hatt gehatt zo loava nå in khüa invétze baz nå in sèll bose hebat geböllt in lem.