L’à cernù l dì de Pèsca, Alberta Rossi, per prejentèr so prum liber, che à per titol “La Valle di Fassa tra fantasia e realtà”.

Alberta Rossi la é da Soraga, la laora te l’Istitut Cultural Ladin desche responsàbola de la biblioteca e l’à semper abù la pascion de scriver. La se à jà metù al luster desche scritora de pìcola contìes o poejìes te vèlch concors, con bon ejit, e ades l’à concretisà l’ensomech del prum liber dut sie.

N liber dut ambientà te sia Val de Fascia, che ela à tel cher da semper, e che ades la ne deida a descorir travers gustégola contìes che vel jir al cher di pìcoi, ma ence di gregn. Anter i protagonisc’ l’é personajes de la lejendes, strìe e bregostènes, salvans e morchies, ma duc é ambienté e i passenea con lesc e tradizions reèles de Fascia, frut de studies e enrescides nasciudes apontin te anter i libres conservé te l’Istitut ladin, ma portèdes inant ence sul teritorie, rejonan con la jent de età.

L liber, dat fora da l’editor Curcu e Genovese, l’é scrit per talian, ma vèlch toch permet ence de sentir la saor del lengaz ladin. L vegnarà prejentà te sala de Consei de Comun de Vich en domenia prum de oril, da les 5 domesdì. Apede a l’autora Alberta Rossi tolarà pèrt ence l’artista Elena Corradini, che à fat i dessegnes per l liber e la tegnirà n laboratorie per i bec. La prejentazion sarà vidèda da la scritora Brunamaria Dal Lago Veneri, e dapò se podarà scutèr ence la musega di “3D Family project” con l’aperitif sport da la Pro Loco de Vich.