“Luli e i colores” l’é na neva publicazion de l’Istitut Cultural Ladin en colaborazion col Comun General de Fascia, scrita da Arianna Iori coi dessegnes de Romana Andělová. L’é na contìa pissèda apontin per i più picoi, con protagonist n strion che à inom LULI, aiegher e curious, che con sia bacheta magica vel encolorir dut l mond e meter mingol de magìa dutintorn: con el, emparèr l’inom di colores per ladin sarà tras sorì! Te chest an deldut fora de anter, dalajà che no l’é stat possibol envièr la families te Museo Ladin per l portèr dant, aon volù che l ge rue desche don de Nadèl a duc i bec de la scolines e di Tagesmutter de Fascia. Aboncont l liber se l troa ence da comprèr te Istitut Cultural Ladin (e te Museo Ladin cò l’orirà endodanef dai 16 de jené) o se l pel ordenèr dal sit internet. Se dapodò aede voa de didèr Luli a fèr doventèr dalbon spezièl chest Nadèl, proà a ve enjignèr na bacheta desche la sia, co na steila su la ponta del color che ve sà più bel. No ocor auter che n picol bachet o na canela per beiver, n toch de papier gros da taèr fora, mingol de scotch per i tachèr ensema e duta voscia fantasìa per la fèr amò più bela! E canche la sarà vertia, manà la foto de voscia bachetes o vesc dessegnes a la direzion mail didattica@istladin.net o meté l tag @museoladindefascia su voscia piates social: Luli sarà content de i veder! Ve fajon a saer che sot la festes sul sit internet de Istitut troarede dotrei dessegnes da se druchèr fora e encolorir e che per l’an che vegn sarà amò de autra novitèdes.