’Z soinda durchgånt zboa djar von birbl Vaia
In questi primi giorni il pensiero va dritto a quello che successe due anni fa nella nostra Provincia ed in particolare sul nostro Altipiano. La tempesta Vaia ha radicalmente segnato i nostri boschi e la nostra mente. Ora, a due anni di distanza, è bene fare un breve resoconto sullo stato di fatto dei lavori di recupero del legname schiantato
’Z soinda durchgånt zboa djar von birbl Vaia un di zèrr von sèll tage makmase no seng atta ünsar earde. Niamat gedenkht in soi lem an söllan bint un a söllaz bazzar azpe da sèll nacht boda hatt geslakk ünsar Provìntz un vil åndre o. Mearar baz viar mildjü mètre kube holtz umgeslakk, zboa toate un åndre groaze schade atti haüsar un att daz sèll boda håm augemacht di laüt in di bèlt. Dar birbl Vaia in di nacht von achtunzbuantzekh zo giana atz noünunzbuantzekh von bimmat hatt durchgeslakk daz mearaste da tschenk sait vodar Provìntz vo Tria un daz meararste da att ünsar hoachebene. In di Kamoündarn boda soin khent getrofft von birbl soinda drinn pitt ettlane schade di sèllnen vo Lusérn, vo Lavròu un dar sèll vo Leve in pa Vesandarn. In ünsar lånt dar bint hatt gemacht an groazan schade atti sait boda geat von Hüttn fin inn in di Vesandarn. Dar bint iz khent auar vodar val d’Assa vångante hèrta mearar kraft un dena izzarse auzgebetart atta gåntz hoachebene, alle di beldarn von tiaftal soin khent umgeslakk. Ma att zboa djar von birbl bia iz gelekk ünsar lånt? ’Z izta zo khöda ke alle di vaüchtn boda soin khent umgedjukht in ünsar kamòu, un daz meararste inn in Kostàlta, soin khent gearbatet vor earst lai darnå in birbl. Haüt di firme boda arbatn in di ünsarn beldarn soin nå zuarzoklauba daz lest holtz boda iz no danìdar un boma mage nützan in di sang, un ditza iz in di Frattn un auz pa Kåmp rivante fin au atti Låmmarn. In ünsar lånt di beldarn boda gehöarn in laüt vo Lusérn soin khent geputzt von alln in vaüchtn boda soin gest danìdar, ditza iz khent vür au attn Sbånt, untar in Fòrte un auz pa Raüt, un ditza bill munen ke di laüt haltn o ka hèrtz ’z lånt vo Lusérn. Ma moch khön ke disa groaz arbat boda iz khent durchgevüart vo vil firme boda arbatn ’z holtz iz khent gemacht umbrómm dar Kamòu in biane zait iz gest guat zo vorkhoava ’z holtz. An åndarz sachan zo khöda iz ke ünsar balt hatt vil baize begela un ditza hatt zuargemachtkhemmen vil firme umbrómm habante vil beng, un soinante pöne di beldar, dise håm gehatt auzzogeba mindar gèlt vor di arbatn atz holtz un håm gemak gian in di beldarn pitt groazan maschì vor ’z holtz: di Harvester boda håm gehakht di drülle, di Forwarder un di Skidder zo ziaga di drülle auz von balt un zo legase nåmp in beng in groaze khèst. Biar bartn neméar seng in balt azpe inar bòtta, ma dar balt laise laise bart pezzarn pittar ünsar hilfe.
