L’é ruà a zil chisc dis un di projec più emportanc e gustégoi dal pont de veduda de la cultura interladina. Dò tropes egn de lurier l’é vegnù fora la verscion ladina de “La aventures de Pinocchio. Contìa de n buratin”, un di classics de maor nonzech de la letradura talièna per bec, che era jà stat traslatà te ben 250 lengac. Ades donca l buratin più cognosciù del mond rejona ence ladin, e adertura te la cater viariantes de Fascia, Val Badia, Gherdena e Fodom.

La realisazion é nasciuda da la colaborazion anter desvalives enc: l’Istitut ladin Micurà de Rü, l Comun general e l’Union di Ladins de Fascia e l’Istitut ladin Cèsa de Jan.

L liber te doi verscions, una più lijiera e una più prestigiousa co la soracuerta de carton, é fornì coi dessegnes dassen bie de la artista ladina Sara Welponer.

La publicazion, che rua giusta te chest temp de festes dant da Nadèl, pel esser ence n bel don per duc i bec ladins e per chi che é curiousc de se arvejinèr a chest pìcol lengaz travers n liber gustégol e enteressant.

L liber é da poder troèr te senta de l’Union di Ladins de Fascia, te Str. Dolomites, 22 a Sèn Jan, tel. 0462.764545.

De chest e de n muie de etres argomenc troède cont sul sfoi “La Usc di Ladins” ence sul web: www.lausc.it