Cari neodi. Vorìa parlarve per dialèt quando ve vedo, poder ninarve e tòrve su la gaida entat che bevo 'n bianco con vòs nono, entant che ve la conto e me la rido.

Contarve su la "la bèla te me stomeghi" senza dover sforzarme col talian. El so parlar en ponta no me piase perché no l'è spontaneo e fao fadiga.

A volte fago frasi che no so, de quele trate lì demò per s?ra mis'ciando dént la lingua nazionale, dialèt de quel nostran e 'n pòc de mòchen, cosa volè capir quan che l'è sera.

I vòssi genitori, mi 'l so bèn, i vòl che 'l zio 'l ve parlìa per talian, che 'l diga come lori quele frasi che le par quasi fate su misura, ma che va via lizere senza 'n sgriff, l'è come se 'n la testa no le dura. "Dai bòcia magna su quele patate","Cossèl tut 'sto gazèr zo per el spiazz" "Dai, dameòra a mi quando te parlo...", e quando ghe ripenso po' la sera, me seita 'n dela ment a nar en tarlo.

Parole e frasi che 'n pieniss la boca, e che stiani enpienia le case.

Scusame per el sfògo, ma ve 'l dovevo dir, no esser come son el me fa sol patìr. Capisso le esigenze de scòle e genitori, mi parlo come magno, l'insegnamento italico ghe'l lasso ai professori.