En sabeda ai 24 de firé da les 4 domesdì te Sorastanza de la Scola de Fascia vegn endrezà la radunanza de l’Union di Ladins de Fascia e dat fora l’Almanach 2017.

L bel codejel che la sociazion ladina dèsc fora oramai da 6 egn, con la gustégola patofies de Manuel Riz, frasch de stampa, vegn prejentà en ocajion de l’apuntament anuèl coi sozi olache l’Union, vidèda dal president Fernando Brunel, porta dant sie bilanz.

Apede a sia atività la sociazion, travers l’Almanach 2017, la ne prejenta ence n gustégol e enteressant panoram di avenimenc più significatives sozedui fora per l’an fenì da pech, con la informazions metudes ensema da la redazion de La Usc di Ladins e i evenc de maor emportanza vedui con l’eie ironich e l lapisc spiz de Manuel Riz. Apede a chesta cronaca spezièla troa lèrga vigni meis na curta biografìa de n personaje ladin che à segnà la storia o la vita de noscia comunanza.

Chest an l’Almanach é stat fat en colaborazion con la Scola, col professor Thomas Zulian e l grop de robotica “Gome neve”: vigni meis l’é na piata dedichèda a n ucel de nosc raion, con n bel dessegn del joen Fabian Mosele, l test de la prof.a Elisabetta Demattio e enscinamai l QR Code per scutèr dal fonin l ciant de ogne ucel. La bela grafica é rencurèda da la prof.a Stephanie Ghetta e sun chest numer se pel troèr ence l’oroscop su l’amor de ClaudiaConta.

L’Almanach ge vegn dat en don chi che à paà o paa ite la tessera de l’Union o l’abonament a La Usc per l’an 2018. Se pel paèr ite ence endèna la radunanza, che sarà viventèda da la sonèdes de n driz de studenc de la Scola, e a la fin sarà n sluch per se fèr na viva.

Ve speton donca ai 24 de firé da les 4 domesdì te Sorastanza de la Scola de Fascia a Sèn Jan.