Da lest bòtta bode hån geschribet vor Di sait vo Lusérn hånaz gehatt kontàrt vodar Zimbar Kolònia, khödante lai bia ’z funtzionàrt, bazma tüat un bazta pensàrn di khindar. Est, ke di Kolònia iz verte, magaz finalmente kontàrn vo allz daz sèll boda iz vürkhent haür. Di khindar inngeschribet soin gest in allz 42, di meararstn vo Lusérn un vo Lavròu, ma apparùmmaz vo Tria odar vo åndre saitn o. Alle dise khindar soin nètt khent in lestéssege periodo, però in an tage saibar gerift zo habanar 36 o. Haür habar gemacht vil schümmane sachandar, alle stianante da in lånt ena zo mochanaz mövarn pinn auto odar pinn pullman. Da earst boch saibar gånt attn fòrte, gianante nå in staige von kriage, fermàrantaz alle di vert bobar håm gevuntet a sagoma un lesante, an earstn azpe biar un dòpo atz beles, di stòrdje boda anìaglana hatt kontàrt. Gerift zöbrest habar gèzzt alle pittnåndar di pröatla pitt khes un salàdo un alle di khindar soin gest kontént. An åndarn tage invétze saibar gånt auz pa Fratt, di khlumman zo vuaz pitt miar un pittar Mariarosa, di groazan attavorå in bici pinn Simone un pinn Devid. Gerift züntrest kan tisch habar gevuntet in Damiano vodar forestale, bodaz hatt kontàrt eppaz von èlbar un von sbemm. Schümmane sachandar habar gemacht in sède, au al Ponte radio, o. A bòtta soinda khent zboa giocolieri, månn un baibe, bodaz håm gelirnt zo nütza a par spilela un an åndra izta khent di Eleonora bodaz hatt gelirnt auzomacha an aquilone boda hatt parìrt a visch, un di Gabriella boda pan mòrgas hattaz gemacht machan an laboratorio pittar kart von djornéln un in tages hattaz getrakk in pa balt zo süacha khlummane vichela un zo khennase pezzar. Ditza iz daz sèll boda iz vürkhent haür, est morpar paitn ’z djar boda khint. (Anna N. N.)