Dò l prum numer, che aea desche tem l’acolienza e l baratament de cultures, l’é vegnù fora enstadì n auter numer de la rivista di joegn de la Scola ladina de Fascia.

L’à inom Filoreflex e l’é n sfoi de 40 piates, con bela parbuda e contegnui enteressanc, pissà per ge sporjer ai joegn na esperienza de giornalism ence travers l sistem de alternanza scola-lurier en colaborazion con l sfoi la Usc di Ladins. Descheche disc l’inom, l vel meter al luster la pascions di joegn, ma ence i envièr a esser reflessives, tel dopie segnificat de esser spieie del mond e de jir col pensier tel fon de la cosses.

L titol cernù chest’outa l’é “mont e elevazion”, aldò de l’idea che se cogn jir en aut per vardèr dalonc e veder sorafora i confins che aon entornvìa.

Scrit per la maor pèrt per talian, l se met dant de ge dèr mìngol de lèrga ence ai etres lengac: ladin, ingleis, todesch, o de etres, en linia con na scola plurilingue desche chela de Fascia, ma ence te la convinzion che durèr desvalives lengac sie na vida per jir sorafora i confins e i pregiudizies.

L nef numer de Filoreflex vegn dat fora te la Scola de Fascia, te la senta de l’Union di Ladins de Fascia e te la Coprativa de Sèn Jan.