Antånto soinda vorgånnt di månat un di bochan un dar herbest von djar 1917 iz gebest afte tür. ’Z Tönle iz khennt zo darvera ke di belesan håm ågegrift di österraichan aft ünsarne pèrng ma da soin khennt augehaltet afte Ortigara, ’z iz gest in sèll stroach, boda berat khennt gedenkht vor långa zait. ’Z hatt bidar ågeheft zo renga un di zait iz bidar nemear vorgånnt, azpi a bazzar vest. Di laüt ingespèrrt a Katzenau soin gest hèrta mearar nidargeslakk un traure, da soin lai augesprunk ummenicht, di oang von khindar, bodaz håm gerüaft nono, soinse gemacht hèrta gröazar, un hèrta mindar håmda gespilt di gabür. Di toatn soin gest hèrta mearar un nètt azpi dar Khoasar, vo schiar hundart djar, in soi pett in groaz haus. ’Z soinda auzgevallt di sachandar vo Karfrait o, bosa lai alle soin khennt zo darvera un hatt parirt soin, ke ’z kriage berat lai gest verte ma dòpo izta khennt dar Piave un ’z kriage iz gånt vürsnen azpe hèrta.

’Z iz gest ditzembre un sidar ettlane tang hattz nètt getånt åndarst baz rengen; in lagar vo Katzenau di nezz un di müffa soin gest bobrall, in air, in di barakkn, in proat pitt gesaga, in hèrtz von laüt. Mèkkante pittnan aisan aftna schina von trèno in an tage håmsa gerüaft alle panåndar.

Da håm gerüaft di nem geschribet afte dokumentn voll pitt stempln, da håm gelekk auz alumma di sèlnen gerüaft, dena håmsen gemacht aunemmen daz bintsche bosa no håm gehatt un laise laise, hèrta untar daz sèll loune getösla, soinsa khennt gevüart in statziong boda a tradotta iz gest sèmm boroatet auzonemmase.

Antånto dar komitàtt von roat kraütz vo Milån hatt gehatt gemacht bizzan in vraütn von internaratn, di sèlln bosa håm gevuntet, ke da beratn gerift in di haupstatziong in sèll tage da sèll ur, azza khemmen zo nemmase.

Dar trèno iz gånt laise un dar viazo iz gest lång. Durch Salzburg un Innsbruck, Landeck un Feldkirch un vo sèmm in Sguizzera dena durch di Grigioni un in Ticino soinsa gerift nidar a Milån an tage spetar baz daz sèll boda iz gest khennt khött. (63. / continua)