Aromài saibar sa auz pa herbestmånat/setémbre, dar summar iz verte un biar djungen mochan bidar åhevan zo giana ka schual.

Haür vor mi iz daz lest djar vo superiori un ditza bill munen ke i moch gem daz peste vo miar zo soina guat zo riva dise vünf djar gerècht.

Sichar barte mochan tüan mearar von djar pasàrt nèt lai vor ditza ma ånka umbrómm haür habar vorlórt an hauf urn peng in coronavirus un est mochpar süachan zo recuperàra allz daz sèll boda velt. Biar studjéntn bizzan nèt vil vo bia ’z bart soin bidar åhevan.

Sa håm gehatt geredet vo tischan pinn rödela, vo naüge khåmmarn bo zo stiana betar.

Sa håm gehatt khött ke halba klasse berat gestånt da huam un da åndar halbe berat gånt ka schual un dòpo beratnsase umgebèkslt. Sa håm o gehatt khött ke ’z berata gest berda hebat ågeheft pellar un ber spetar zoa azta di korìarn un di autobus beratn gest mindar voll.

An lestn però, alméno in moi schual, izta gebèkslt bintsche nicht umbrómm sa håm lai detzìdart zo nütza alle di uscite vo sicurezza zo machanaz inngian un auzkhemmen getoalt un zo geba alln 10 minùttn rikreatzióng durånte in tage zoa azzase nèt vennen alle pittnåndar.

Ma boazt nèt bia ’z khemmenda organizàrt di aule, azpar håm in platz zo halta an mètro vo distanza soinante in 22 in klasse.

Di schual heft å un biar soin no alle preokkupàrt vo disan schaülan virus un böllatn sichar bizzan mearar.

Ånka azza beratn guat zo organizàra gerècht di urn ka schual stianata dar problèma von mezzi di trasporto boda beratn hèrta voll pitt laüt, ke pur tragante di mascherina beratnsa ågehenk ummaz pittn åndar.

Paitante azza machan bizzan eppaz mearar sperarbar azta disa situatzióng khemm hèrta pezzar un az allz khear bidar bidrùmm azpe ’z iz gest an earstn. (Anna N. N.)