Alln vünf djar in alle di kamoündar khemmenda vornaügart di Konsìldje un asó atz 20 un 21 von herbestmånat di lusérnar o soin gånt zo votàra. Atz Lusérn soinda gest zboa liste: Lusérn in hèrtz un Huamat; d’earst hatt gehatt alz kandidàt pürgermaister in Gianni Nicolussi Zaiga un d’åndar in Davide Nicolussi Moz.

Atz Lusérn håmda rècht zo votàra 209 laüt, residenti in lånt un 61 lusérnar boda lem auz von Beleschlånt un boda soin inngeschribet all’AIRE. Vo dise soinda gånt zo votàra 196 lusérnar. ’Z hatta gebùnnt di lista Lusérn in hèrtz pitt 119 vote; di lista Huamat hattar gevånk 73, dena soinda gest 3 skède pitt vote nèt validi un a baiza.

Pürgermaister vo Lusérn iz est dar Gianni Nicolussi Zaiga un vodar lista Lusérn in hèrtz barta gian in Konsìldjo von Kamòu dar Luigi Nicolussi Castellan (39 vote), dar Giacomo Castelletti (32 vote), dar Matteo Nicolussi Castellan (29 vote), dar Giorgio Nicolussi Castellan (21 vote), di Nadia Nicolussi Paolaz (13 vote) un di Katia Nicolussi Moz Chelle (12 vote). Vor di lista Huamat barta gian in Konsìldjo dar Davide Nicolussi Moz (kandidàt pürgermaister), dar Andrea Zotti (22 vote), di Elena Nicolussi Golo (21 vote) un di Giulia Nicolussi Castellan (18 vote).

In gelàich tage di laüt håm gemak votàrn zo ledrénra in nummar von parlamentér o. Saiz atz Lusérn azpe in Beleschlånt håmda gebùnnt di laüt boda bölln ledrenarn in nummar von parlamentér un asó pittar åndar legislatura di senatör bartn pasàrn vo 315 att 200 un di deputèt vo 630 att 400.

Atz Lavròu soinda gest drai liste; gebùnnt hatta dar “alt” pürgermaister Isacco Corradi pittar lista “Uniti per Lavarone”, pitt 408 vote, di lista “Lavarone obiettivo comune” pitt Claudio Stenghele alz kandidàt pürgermaister hatt gevånk 321 vote un di lista “Siamo Lavarone” pitt kandidàt pürgermaister in Karl Birti, hatt gevånk 54 vote. (E.v.K.)