Vor an månat hånne gischribet vonan bichtegen schraibar boda hatt gilebet durch in Mèrika vor zboahundart djar, Edgar Allan Poe. Balde hån gimocht zornìrn vo baz z’schraiba disan månat soinmar khennt in sint vil åndre schraibar boda hebatn gimak soin bichte ginùmma zo maga håm an artìkl afta ünsar “Sait vo Lusérn”: Henry David Thoreau, Alan Moore, Terry Pratchett, J.R.R. Tolkien un åndre o. Darnå hånnemar sèlbart givorst: ombrómm alle di sèllnen bodamar soin khennt in sint håm geschribet odar belesch odar inglés? Ombrómm khummane tschinésan, indiè, rüss?

’Z magat soin ke i pinnz i bode khenn khummane åndre schraibar. Furse khånante lesan un schraim inglés håmar interesàrt mearar di libardar bode hån gimak lesan in da gelàichege zung bosa soin khennt geschribet: belesch, inglés odar azpe biar.

Dena hånne gibarnt ke balma inntretet in a bibliotèk odar in a geschèft boda vorkhoaft libadar makma seng ke ’z khemmenda vorkhoaft vil mearar belese odar inglésan schraibar baz püachar geschribet pellar in åndre zungen un spetar gitrakk belesch un inglés. Sichar, bar soin in Beleschlånt un di belesan schraibar bartn hèrta soin di meararstn vorkhoaft! Ma ombrómm vo alln in püachar gischribet in di bèlt lespar daz meararste di sèllnen boda khemmen her vodar Mèrika odar abe vodar Gran Bretagna?

Ma mage sichar nètt khön ke ’z iz ombrómm di inglésan un di merikè soin brevatar z’schraiba baz åndre!

’Z soinda schraibar boda, nètt asó bait vort von Beleschlånt, soin asó gikhennt un gilest zo khemma skuàse adoràrt sovl bisa beratn eppaz mearar baz lai månnen odar baibar un da in Beleschlånt, invétze, bintsche khennense. Sovl azpe zo khöda ke ’z iz starch malaméntar vennen libadar vo schraibar azpe di prüadar Strugatsky boda durch in Russia soin gihaltet bol mearar baz Star Wars, Solzhenitsyn un Harry Potter gilekk panåndar. Eppaz destrar iz vennen püachar von schraibar finlandese Arto Paasilinna sidar azta a khlummana “verlag”, Iperborea, hattar gètt zo tüana zo drukha alle soine libadar. Ploaz åndre soin nètt guat zo khemma gikhennt vo vil laüt da kan üs un invétze vort vo da soinz khennt z’soina schraibar “kult”: Murakami, Nesbø, Linqvist etc..

Asó, vor di månat boda khemmen, hånne zornìrt z’schraiba aft disan fòldjo lai vo schraibar boda nètt schraim belesch odar inglés, di sèllnen mindar gikhennt da kan üs, ma bodaz magatn givàlln.

Rodolfo

(didascalia: Nuri Pakdil )