A Zimbar Kristpòum in platz vo San Piaro
’Z soinz ungefér viartzekh djar boda a par a statt/lånt von Beleschlånt schenkht, alle djar, a vaücht odar a tånn dar statt von Vatikåno. Von djar 1982 dar Kristpòum khinnt augemacht in platz vo San Piaro. Ditza djar disa vaücht boda bart khemmen gesek un fotografàrt vo tausankhar laüt khinnt von ünsarn pèrng. ’Z iz gest dar earst von snitt von djar 2008 balda dar Bruno Scalzeri, (dar “alt” pürgermaister vo Pedemonte), Vorsìtzar von konsòrtzio usi civici vo Ròtzo, San Piaro un Pedescàla, hatt geschribet in mons. Antonio Mattiazzo voalante a vaücht alz Kristpòum vor in Vatikåno. In soi lettar khüttar ke ’z sberat schümma azta a vaücht boda iz augebakst atti earde boda hatt gesek daz Earst Bèltkriage magat khemmen genützt alz Kristpòum. Dar segretàrdjo di Stato von Vatikåno hatt respùndart gebante kunt ke pitt dise motivatzióngen mattmaz tüan. Dar hatt o geschribet, però, ke ’z soinda sa an hauf lentar un stattn von Beleschlånt bodase håm se o gevoalt un vor ditza mochtma paitn ulf djar. Un asó dise tang di vaücht iz khennt gehakht durch in di Trügela un getrakk, augehenk attnan elikòttero, finn in spòrtplatz vo Valdastico. Da soinda zuargestkhennt di khindar von schualn vo Valdastico un vo Ròtzo un di vaücht, lång 26 mètre, iz khennt inngevest un gevazzt attnan kåmion lång 30 mètre un hatt gevånk in bege vor Roma; a bege lång sèkshundart kilòmetre ma boda, an lestn, bart machan seng “d’ünsar vaücht” dar gåntz bèlt.
In platz vo San Piaro dise tang soinsa nå auzorüsta in Kristpòum, a Kristpòum boda hatt nètt lai gisek in schade von Earst Bèltkriage ma in schade boda hatt gimacht dar birbl Vaia o.
Azta dar Kristpòum khinnt vodar Zimbar Earde, dar presèpe khinnt vo biane betar. Dar iz khett nidargevüart un augemacht vonar feròin vo Scurelle. ’Z soinda geböllt soin 3 kåmien nidarzovüara allz un dar presèpe iz gemacht vo ettlane haüsla pitt holtz un vünfunzbuantzekh statue, alle groaz azpe a mentsch.
Allz ditza iz khennt inngebaiget gestarn, fintzta 5 von Kristmånat, di viare un a halbez in tages un bart stian finn atz 13 von hochnach.
E.v.K.
