Finanziamenc regionai per la mendranzes
L’assessor Detomas à arsegurà ence per l’an 2018 l sostegn ai Istituc culturai e l stanziament per la Ciasa de la Moniarìa a Sèn Jan
BOLZANO. La Jonta de la Region Trentin Sudtirol à aproà en mercol ai 19 de dezember i ultimes provedimenc de l’an en favor de la mendranzes linguistiches regionales.Con sodesfazion de l’assessor regionèl ladin a la Mendranzes linguistiches, Giuseppe Detomas, l’é stat confermà ence per l 2018 la adejions ai Istituc culturai ladin, mochen e zimber, co la respetiva quotes de € 120.000 per l'Istitut “Majon de Fascegn” e € 80.000 per ogneun di doi istituc mochen e zimber.
Amò apede, en cont capital, l’é stac conzedù € 250.000 a favor del Comun de Ciastel (BZ) per l finanziament de n projet de investiment per la mendranza linguistica ladina te la frazion de Bula.Tinultima, per Fascia l’é stat stanzià € 389.536,00 a favor del Comun General de Fascia per l finanziament en cont capital del projet de restaure e recuperazion a doura publica de la storica “Ciasa de la Moniaria” a Sèn Jan, da destinèr a la promozion e la defendura del lengaz e de la cultura ladina. Per chest ultim intervent, che perveit n cost complessif de € 2.000.000, la Region se à empegnà jà i egn passé, con € 543.150 te l'an 2015 e € 221.850 te l'an 2016, ruan con chest ultim stanziament a la soma de € 1.154.536.