Haür o izta bidar gerift dar summar boda hatt getrakk pitt imen daz barm, di sunn un åndre schümmane sachandar boda ’z lånt lekk au pròprio in disa stadjóng. Azpe alle djardar disa boch izta o ågeheft da Zimbar Kolònia, an prodjèkt von Kulturinstitut Lusérn gemacht vor di khindar boda håm von sèks atti draitza djar un boda bölln lirnen eppaz azpe biar, stianante pitt åndarn khindar un pasàrante di zait auz von haus. Da Zimbar Kolònia iz pròprio pensàrt vor ditza: di animatör mochan ren pinn khindar, machanse spiln un lirnen a par kantzü hèrta allz azpe biar. Di khindar soin nètt obbligàrt zo respùndra azpe biar, ånka umbrómm ’z berat impossibile, dato ke nètt alle soin vo Lusérn odar khånen di zung, ’z iz solo pensàrt zo machase gebénen un machanen a pizzle ’z oar un zo lirna a para bort boden mak hèrta servìrn. Alle di djar pittar kolònia di khindar mang tüan meararne sachandarn, pensàrt apposta zo machase sfogàrn un stian luste. Soinante au atti pèrng di khindar, gianante ummar pa balt, lirnen zo khenna di natùr von lånt, pitt alln soin vichar, roasan un èlbar. Di kolònia però iz nètt lai gemacht zo spila, infatti ’z izta an ur dòpomittartage boda di khindar rilasàrnse in giardino odar machan di kòmpiti vodar schual. Azpe animatör haür saibarda i, moi pruadar Simone, dar Devid von Khèrrar un di Mariarosa von Balìn, bodaz helft alle tang zo lirna kantzü, poesie un getåntza zo lega au in spettacolino boda bart khemmen gemacht in lest tage, boda bart soin atz 23 agosto, snittmånat. I hån gemacht di kolònia ’z djar pasàrt o un pròprio azpe baldese hån gemacht vo khinn pinneme pròprio divertìrt. I speràr az sai gest asó vor di khindar ma zo bizzasan mearar hånne gevorst a par sachandar dar Ingrid von Knapp bodase macht haür vor da earst bòtta. “I grüazte Ingrid, baz böllasto tüan haür in kolònia?” “I bill spiln in palú un in calcetto pitt moine tschelln un pitt diar o!” “Un azpe gite bo böllasto gian?” “Au attn Spitz vo Leve.” “Baz iz vor di di kolònia?” “I hånse nia gemacht un vor mi ditza iz daz earst djar, ma i boaz ke ’z iz eppaz schümma un ke i mage khennen naünge khindar un lirnen naüge börtar azpe biar.” “Barstoda gian ’z djar boda khint o?” “Ja i gloabe vo ja ma i moch seng bia ’z geat haür.” Insomma, di kolònia gevàllt pròprio alln, groaze un djunge, animatör un khindar, un biar bölln trang vürsnen disa traditzióng boda gitt alln di opportunità zo stiana pittnåndarn, vorgèzzante di tv odar in telefono, spilante in gåntz tage, machante lavoretti un gianante ummar pa lånt.

A.N.N.