S Bersntoler Kulturinstitut hòt mearer ziln za trong envire: der bichteste ist gabiss za hòltn ont za gem bèrt en de inger sproch. An groasn projekt, nou nèt garift van gònze, ist der sèll va de “beiterpònk”, ver za meing vinnen ont prauchen de beirter va de inger sproch en internet aa.

En de beiterpònk as men vinnt en internet, secht men a skeda ver an iatz bourt. Der doi projekt, bart lònk tauern. De mitòrbeter van Institut miasn zòmm leing de beirter en internet. Ver derbail sai' kemmen aroganommen de beirter as sai' asn bersntoler beiterpuach.

Derzua en de beirter va de inger sproch, bart men vinnen naia beirter aa, as haitzegento praucht men òlbe mear, zan paispil s “Tolgamoa'schòft” oder der “Amministrazionrot” ont asau envire. Ber meing song as de doi beiterpònk ist eppes rècht, ver za meing iberzetzn de sproch.

A naieket ist an programm asn telefonin : de “APP MOCHENO”, as men vinnt en “google play” oder en “app store” ont s ist ganua suachen “mocheno” oder “DIZIONARIO MOCHENO”. Men mu aronemmen asn telefonin der programm van bersntoler beirterpuach, ont hom en òlbe mit. Ver de sèlln as òrbetn pet de sproch oder ver de sèlln as sai' enteressiart za learnen sa, ist an schea'n ont destern strument. Ber meing song as s ist augòngen a naia meglechket ver de inger sprochminderhait, as derkennen lai schiar òlla de lait, iberhaupt de jungen : meing lesn, ibersetzn ont learnen de ortografi, as bersntolerisch asn telefonin. (m.p.b.)