En vender ai 12 de otober, da les 17.30 te l’aula de l’Auta Formazion del Liceo de la Scola Ladina de Fascia a Sèn Jan, vegn prejentà l liber “Scritores Ladins. Materiali per la storia della letteratura ladina di Fassa”.

Con chesta neva publicazion, metuda ensema da sie diretor Fabio Chiocchetti, l’Istitut Cultural Ladin “majon di fascegn” jonta n auter tassel al rich chèder de la publicazions dedichèdes a la linguistica e a la leteradura ladina. 

L se trata de n’opera nasciuda soraldut per rejons pratiches, per ge sporjer ai dozenc e a chi che jirà a insegnèr te Fascia n strument che sibie sorì da vardèr fora, olache se pel troèr ite tesć e informazions su la desvaliva tapes che, dal scomenz de l’Otcent enscin anchecondì, à fat l ladin fascian tel panoram de la letradura ladina. 

Na opera che bina adum te n liber soul i contribuc de carater linguistich e leterèr sparpagné fora te desvaliva anèdes de “Mondo Ladino” e te de autra publicazions, metui ensema te caranta egn de atività da Fabio Chiocchetti, diretor de l’Istitut Cultural Ladin. “Materiai de lurier”, donca, vegnui fora dal besegn de binèr ensema, studièr e fèr cognoscer a la jent duta na lingia de tesć ladins, veies e manco veies, mai publiché o senestres da troèr fora, aldò de n program editorièl jà dessegnà fora al scomenz de la storia de l’Istitut dal mai desmentià prof. Luigi Heilmann.

Chisc studies ades vegn perferii, revedui e comedé fora, dantdaldut per i dozenc e i studenc che tol e tolarà pèrt ai corsc de Auta Formazion “Antropolad”, metui a jir dai Atenees de Busan e de Trent, donca destiné soraldut al mondo de la scola e a duc chi che ge pervegn de tramanèr la “cultura ladina” a la generazions che vegn dò. 

I scric, pèrt per talian, pèrt per ladin, i é metui jù en orden cronologich, con chela de dessegnèr fora amàncol l’idea de n percors storich coerent. 

La pèrt antologica é stata smaorèda con tesć mai dac fora, desche vèlch poejìa de Tinoto Monech (Valentino Dellantonio) e l test va ite ence te vèlch costion senestra che caraterisea la storia leterèra del secondo Otcent, studian la relazions anter personajes desche Giosef Brunel, Hugo de Rossi e Amadio Calligari da Larcioné. 

N’opera de nonzech che vegn prejentèda dantfora ai dozenc e ai ensegnanc del davegnir de la scola ladina de Fascia e a chi che à a cher l ladin e la letradura ladina. Duc é envié.