’Z soinz oramài a par djardar boda dar Kulturinstitut hatt ågeheft bidar zo nütza di altn nem von månat boda soin gest gånt vorlórt in di zaitn un ke, lai pittar hilfe von libadarn un von studjös vodar ünsar zung, soin khent gevuntet un bidar genütz. Un alóra est ke bar soin in ludjo, höbiat, bia sa håm khött ünsarne altn, parìrtzmar djüst ren von höbe.

In ta‘ vo haüt saibar gebónt z’sega di tratör boda tüan oramài allz daz sèll boda dise djar, anvétze, håmda getånt di laüt. In di earstn djardar von 1900 alle boazpar ke da atz Lusérn soinda gest vil khüa, anìaglana famìldja hattar gehatt a par zoa zo mèlcha, zo nütza in mist vor in gart un zo zügla au ’z khèlple zo vorkhóava odar zo macha vlaisch. Pròprio vor ditza alle di famìldje, pan summar, håm gement ’z höbe un, pròprio umbrómm di famìldje un di khüa soin gest vil, håmsa gemocht gian zo mena alle di tökkla boda soin gest, fin nidar atti Prach, atti krötz, au fin attn fòrte un, vor di sèllnen boda pròprio håm gehatt khummane bisan, dar kamòu hatt gètt tökkla au attn Kåmp o. Di zait von höbe hatt ågeheft a S. Piaro un Paolo, di laüt håm gemocht boróatn di ordégne: tengln di sengest pittn tenglhåmmar, richtn di rèch, auzziang un vlikhan di lailechar von höbe. Dena, apéna az iz khent schümma bèttar un di sunn hatt ågeheft zo mèkka djüst, alle håm gement pittar sengest, hèrta mòrgas balda ’z gras iz gest no nazz von tau. In tages hattma hèrta gemocht drenen ’z höbe un dena, vor dar tschòi, alle håmz geschöbart zoa zo haltaz trukhan. Ditza alle tang, vor drai tage: in dritte abas, ’z höbe iz khent gelekk in di lailechar von höbe un getrakk, affon rukkn, au atti tetsch odar in di hüttn boda ettlane lusérnar håm gehatt nåmp in bisan. Atti tetsch ’z höbe iz khent auzgebetart un getrizzlt; un ditza håmz squàse hèrta getånt di khindar, spilante un divertiràntese un dena vil laüt håm gelekk saltz atz höbe zoa zo haltaz trukhan. Est provàrbar zo stèllanaz vür di lestn von ludjo: alle di haüsar vo Lusérn voll pitt höbe atti tetschan, un lai asó mabar pensàrn atti distrutzìong boda hatt gemacht daz groaz vaür von djar 1911 boda, partìrante von Pill hatt distrüdjart halbe ’z lånt pròprio umbrómm ’z höbe hatt lai gevånk un getrakk ’z vaür ummar bobràll. Ma khearante bodrùmm attn tage vo haüt, iz djüst ke, schaugante å a schümmana bis apéna gement un segante di bale von höbe, an pensìaro geat hintar kan ünsarn altn, att soine fadìng un höarante gerècht in gesmàkh von höbe mabar biar o, vor a pizzle, lem di altn zimbarzaitn.