Èrt - L’é ruà a l’edizion numer 4 l’event artistich che dal 2012, ogne 2 egn, vegn endrezà a Poza per recordèr l zipiador e alpinist Toni Gross, stat ence ensegnant e diretor de l'Istitut d’Èrt ades Liceo artistich, ma ence per viventèr na sajon turistica che é dò a fenir via e sensibilisèr ghesć, jent del post e studenc de la Scola de Fascia a l’èrt e a la scultura tel legn.

Per duta la setemèna che vegn, dal Piaz de Comun de Sèn Jan e su per duta la strèda de Meida, enscin al Piaz de Sèn Nicolò, japede l Ski stadium che tel meis de firé che vegn ge darà alberch a la garejèdes di di Campionac Mondièi junior de Schi Alpin 2019, 11 artisć se darà jù duc i dis per lurèr fora dal zirm na opera leèda apontin a la competizion mondièla en program te nience 6 meis, sul tem “Gregn evenc e mont”.

Apede ai organisadores: la Scola Ladina de Fascia, l'Union di Ladins, l Comun de Sèn Jan  e l’Istitut Cultural Ladin, l’event é sostegnù da n muie de istituzions e privac, pean via da la Region Trentin Sudtirol, e dapò l’APT de Fascia, dal Consorzie Eletrich de Poza, la 3 Frazions de Poza, Pera e Vich e l Comitat Organisador di Mondièi junior de schi alpin 2019.

I artisć, che rua ence da fora da la Tèlia, ciaparà alberch ti Hotìe Valacia e Meida/Anda e i podarà magnèr ti restoranc “Le Giare” e “Aida”, ensema ence ai studenc del laboratorie didatich che vegn endrezà te Piaz de Comun, e ai professores Davide e Tiziano Deflorian, che se stèsc dò.

Anter i 11 zipiadores l’é 3 femenes e 8 omegn; 2 l’é i fascegn, Paolo Costazza (venjidor l’an passà) e Stefania Pederiva, dapò l’é Gianluigi Zeni, Toni Venzo (venjidor de la pruma edizion) e Giovanni Capelletti, che i à jà tout pèrt al Simposie e amò la spagnola Marta Fresneda, Ferdinando Gatto, Francesco Rizzardi, Marco Martello “Martalar”, Giacomo Scandolo e Marta Zucchinali, che i tol pèrt per la pruma outa.

En sabeda ai 15 de setember tel prum domesdì la operes cognarà esser fenides e les sarà valutèdes da na jurìa con a cef l cognosciù architet Gianni Pettena. Tel medemo dì ence duta la jent podarà votèr l'opera che ge sà più bela e da les 6 da sera te sala del Consei de Comun de Sèn Jan sarà la premiazion, con i venjidores del prum, secont e terz pest e del pest del publich.