L’era l’an 1887 canche a Cianacei e Grìes vegnìa metù sù la “Sozietà de la Bandiera”, na sociazion pissèda per portèr inant l’identità e l sens de partegnuda te la comunanza de chisc paìjes. Dut se à serà sù del 1929, ma anchecondì l Grop de la Mèscres de Cianacei e Grìes, vidà da Mario Lino Debertol, se à pissà de meter endò sù chest grop, en segn de respet e onor per la storia di giaves.

La “Neva Sozietà de la Bandiera” de la frazions de Cianacei e Grìes é stata prejentèda ofizialmenter tel dì del Sacro Cher, en vender ai 8 de jugn, te sala de Consei de Comun de Cianacei e dapò benedida la domenia da don Mario Bravin apontin te la gejia dedichèda al Sacro Cher, te la messa de sègra a chela che à tout pèrt ence de etres gropes de val con sia bandieres.

L’é passà 130 egn da canche l’era nasciù la veia Sozietà, e l’é stat de gregn mudamenc - à dit l president Mario Lino Debertol - ma l spirit de identità l’é restà vif.

Apontin per l cedean l’é stat pissà de meter en pe la Neva Sozietà, che l’à podù vegnir prejentèda a la jent dò n lonch lurier de enrescida. L’artist Claus Soraperra à studià fora na neva bandiera, che pea via da chela storica ma la porta vèlch aspet nef, e Claudia Dorigotti Conta à pissà ai guanc de Bandierèl e Sotecouda, con ciapìe, ciuzé e dut coche carenea. Ence l veie Statut é stat mingol mudà per vèlch adeguament ai tempes de anchecondì. Dut à podù vegnir fat de gra al didament finanzièl de la Frazions de Cianacei e de Grìes, del Comun de Cianacei, del Comun general de Fascia, de la Region e del Bim Adesc e n develpai de cher é jit endèna la prejentazion ence a la doi nones de la bandiera, Erna Pedratscher e Zita Pitscheider. Duc i sentadins de Cianacei e Grìes pel se scriver ite a chesta Sozietà, che no l’à fins de vadagn, e domanèr la prejenza de la Bandiera a sia festes.