I se à dat inom “Gome neve” e “Gome veie” i doi gropes de robotica de la scola ladina de Fascia, che da vèlch an, sot la vida del professor Thomas Zulian, i porta inant projec de gran enteress tant da passèr la selezions locales e se vadagnèr l’azess a la finèles nazionèles o internazionèles.

Chest an l grop di più gregn, le “Gome Neve”, à lurà fora n projet scientifich che à inom “Greener Water” e che tol dant e chier soluzions ai problemes ambientèi di ruves de val, che vegn cà da la prejenza de zentrèles idroeletriches, da impianc de depurazion oramai veies e da la doura de l’èga per la produzion de la neif programèda. Dò aer analisà la situazion i studenc à lurà fora n projet inovatif e ecologich de fitodepurazion che pea via da la capazità depuratives de la piantes, con la colaborazion de la Rei de la Resserves, l Consorzie Eletrich de Poza e l’APPA.

Via per d’aisciuda, con la colaborazion del CEP, la fitodepurazion vegnarà metuda a jir a na vida concreta, envian via i lurieres de bonifica del teritorie.

L grop de robotica di più joegn, le “Gome Veie” à lurà enveze per troèr alternatives a la parèdes de ziment che vegn fat ti ruves per stravardèr la segureza, ma che i muda l’ecosistem.

Col projet scientifich “Ruf net” i studenc à chierì vèlch soluzion neva che posse miorèr la naturalità di ruves, didan tel medemo temp la creatures che vif te l’èga.

I studenc à vijità l Laboratorie de Idrodinamica aló da la Facoltà de Enjegnerìa Ambientèla de Trent, i à analisà l jir de l’èga e coche l vegn influenzà da la parèdes de segureza e i à chierì soluzions miores per l paesaje e per la creatures che vif te l’èga, con la doura de materièi naturèi al post de strutures de ziment.

I resultac de chesta enrescides vegnarà ilustré te scontrèdes publiches, vegnarà fat vèlch realisazion concreta sul teritorie e la enrescides vegnarà portèdes dant te desvaliva classes de la scola.

I gropes de studenc de robotica “Gome neve” e “Gome veie”.