Abia òll jor, haier aa kimmp organisiart van Istituto Bellunese di Ricerche Sociali e Culturali der konkurs as denkt de figur va de grèfin Caterina De Cia Bellati Canal. Der prais ist kemmen gabellt ont tschenkt van sai’ mònn, der ingenier Alberto de Cia. Iaz as er ist nea’mer, ist der Istituto Bellunese za trong en envire, abia as er gabellt hòt. S ist an konkurs as kimmp organisiart òll jor ver za gem bèrt en piacher en de tesi va laurea. De prais kemmen gem a jor ver schòrt, a vòrt en de piacher ont a vòrt en de tesi. Caterina De Cia Bellati Canal ist storm en 2006. De hòt se laureart gahòp en 1948 en Padua pet an dokteròrbet as de sproch va Timau/Tischlbong va de Provinz va Udine. Der prais ist kemmen organisiart ver en earste vòrt en 2007. Zan earst de konkurs hòt enteressiart lai Feltre, dòra de Provinz va Belluno ont iaz enteressiart er de gònze region van Alpn ont Venezia. Van 2010 er kimmp organisiart ka Belluno en sitz van Istituto Bellunese di Ricerche Sociali e Culturali ont er ist offet en òlla de provinzn as stea’ as de Alpn ont iberhaup en de sèlln va de region Veneto. Er hòt de unterstitz van Minister van Kulturalpahalter, van Cai ont van Gruppo Italiano Scrittori di Montagna. Der prais ist offet en òlla de sèlln as belln toalnemmen pet drucketa piacher oder dokteròrbetn. De edizion va haier ist reserviart en de tesi va laurea. De autorn as nemmen toal kemmen toalt en zboa. S hòt s humanistisches toal ont s sèll van bissnschòft. En earste toal sai‘ de òrbetn as de antropologi, s gasetz, de ekonomi, de linguistisch, de literatur, kritik, soziologi, arkitektur ont gschicht. En zboate, de arkeologi, de botanik, de geologi, de paleontologi ont de zoologi. Ver za nemmen toal mias men ogem tesi magistrali, as sai‘ de sèlln as kemmen gamòcht en de spezialistische laurea. De tesi miasn diskutiart kemmen sai‘ en de leistn zeichen jor ont de toalnemmer meing oge òrbetn as hom schoa‘ toalganommen en kokurs. De òrbetn barn austschaukt kemmen va de giuria as ist gamòcht va auskenneta lait en doin temen. De giuri ist gamòcht, ver en humanistischn toal, va: Piercarlo Begotti a de Società Filologica Friulana, Flavio ont Fulvio Bona, Diego Cason, Franco Crevatin, Cesaremaria Glori , Letizia Lonzi, Adriana Lotto, Domenico Sagui Pascalin, Daniela Perco, Cesare Poppi, Antonio Prade, Giorgio Reolon, Giuseppe Vignato, Flavio Vizzutti. Ver en zboate toal, Carlo Argenti, Michele Cassol, Giancarlo Garna, Danilo Giordano, Cesare Lasen, Carlo Mondini, Luca Salti, Andrea Tintori, Aldo Villabruna. De òrbetn miasn ogem kemmen vour de 30 van prochet 2019 en de kanzlai van konkurs ka Belluno.