’Z iz sa a par djar, boda alle di vert balda rift dar summar khinta gemacht a manifestatzióng organizàrt von Kulturinstitut Lusérn. Bar soin nå zo reda von „Lest Schèrtzar“. Daz earst djar hattma gimocht gian ummar pa lånt un aulesan altz geplèttra un alte attrezzi vo dise djar. I gidenkhmar ke ’z iz nèt gest dèstar vennen allz, umbrómm ma hatt gemocht vorstìan ’z bort azpe biar un süachan, vor quasi allz habar givorst in altn von lånt. ’Z djar dòpo soinda gest zo süacha sachandarn in pa balt. I gidenkhmar ke i un moi squadra soin gest nå zo gebinna, ma bar håm vorstånt letz an indizio un soin gånt zovorlùr in Milegruam. Vert invétze izta gest zo giana au kan Hüttn, Kåmp, fin attn fòrte un an lestn hattma gimocht machan an cruciverba azpe biar. ’Z izta o gest nidar in Spòrtplatz ’z barèkle von pröatla, boda hatt auzgètt z’èzza un zo trinkha un dar dj, boda hatt hèrta augilekk musìk fin abas spet. Haür o paiparaz nidar in Spòrtplatz von Kulturverein, an såntzta 21 von setémbre. Di squadre mochan soin gimacht vo alméno viar laüt anìaglana. Azta in a squadra soinda khindar untar di zbölf djar, mochta soin a maggiorenne. In a squadra mangda soin mearar baz viar laüt o, ma di praise soin lai vor viare, quindi nèt alle, azza gebinnen, vången an prais. Azpe sa khött, bartnda soin vil schümmane praise vor ber ’z barta gebinnen. Zo macha pezzar in abas, barta soin ’z barèkle von pröatla un dar dj, bodaz bart haltn kompanjìa fin spet in di nacht. Khent in vil!

An gruaz, Samuel Pedrazza