Bille månnen, trutn, bölf, strie un alle di sèllnen boda lem in di stòrdje vo Lusérn bartn khemmen gidenkht vo da vür in di artìkln bode bart schraim månat vor månat. Haüt daz earst schaubar aftn bill månn, in bimmat (otóbre) barpar khennen pezzar di trut.

Di khindar vo Lusérn boda khånen di altn stòrdje von ünsar lånt bizzan ke inn in balt matma vennen an hauf laüt un squàse alle znicht. Dar Sambinélo trakhte zovorlùr in nebl, dar taüvl billtar stoln di seal (ma azto pist fürbatar baz er masto khemmen raich), di strie, di striü un di selegen baibla sovl mangsadar helvan azpe nètt ma di birsarstn von alln soinz di billn månnen un di billn baibar. Azta a khin geat zo vorlùr inn in balt un tretet inn in a haus vonan bill månn odar vonan bill baibe khintz sichar gipòkht, augivöaztart, gisotet un gèzzt! Zo maga vonkìan un nètt khemmen gèzzt ’z püable odar ’z diarndle mocht töatan daz bill baibe; ’z Tüsele Marüsele macht dartrinkhan soi billa liaba nona drinn in an pach, di khindar vodar stòrdja “Dar bill månn un daz bill baibe” in bill baibe hakhansen lai vort in khopf pittnan pail. Azma bokhennt in bill månn epparùmmaz mocht stèrm.

Di billn månnen von stòrdje vo Lusérn soin eppaz åndarst baz di sèllnen boma mage vennen in åndre stòrdje ummar pa bèlt. Sichar da soin nètt halbe vich un halbe månn pinn snabl voll herdar azpe dar Yeti von pèrng in Tibet odar dar Sasquatch in di beldar durch in Mèrica. Da soin njånka azpe di sèllnen von Beleschlånt odar von Taütschlånt boda lirnen in månnen bia zo luppa di milch un ettlane vert soinsa kartza timme zo lazzase seng von åndarn. Di billn månnen un di billn baibar vo Lusérn machan vill mearar di vort baz alle di åndarn umbrómm in ünsarne stòrdje vorstéatma pellar odar spetar ke ber ’z billta vrèzzan di khindar iz epparùmaz vodar famìldja. Di stòrdja von Tüsele Marüsele khütt gåntz hoatar “In an tage iz gånt inn pa balt un hatt gevuntet ’z haus vodar “liabe nona”, a billz baibe”. Nidar züntrest dar stòrdja “Dar bill månn un daz bill baibe” khentma zo darvéra ke da znicht stiafmuatar von khindar iz gestorbet un bogràbet lai azpe daz bill baibe gitöatet von khindar. Dar tatta, invétze, khint bidar guat azpe dar bill månn boda “vrizzt khummane åndre khindar mear”.

Vor ünsarne Alte balma khennt groaz möchtmase neméar vörtn zo khemma givrèzzt vonan bill månn ma ma möcht schaung bol au nètt zo khemma sèlbart bill. Alle biar mang khemmen bill azpar neméar ren pitt khumma åndarz mentsch un stian hèrta alùmma.