Zo maga stian gerècht alle di laüt mochan munen z’soina a pizzle pezzar baz di åndarn.

Furse pensàrtma z’soina a pizzle fürbatar, odar ertegar, ke ma arbatet mearar un pezzar baz di åndarn odar ke ’z soinda sachandar boma boazt pezzar baz alle.

Khummana schånt in ditza! Asó arbateta ’z hirn von laüt un ma makta pròprio nicht tüan.

Stianante asó di sachandar makma vorstìan ke alle biar munen o ke di sèllnen bodaz gilàichan soin sichar pezzar baz di sèllnen bodaz nètt gilàichan. Berda arbatet azpe biar arbatet sichar pezzar baz di sèllnen bodaz nètt tüan, asó azpe di sèllnen bodaz nètt pensàrn azpe biar sichar soin a pizzle stokhat ...un asó vürsnen.

Asó hakhpar di bèlt tortemìtt, aftna sait di sèllnen azpe biar, schümma, furbat, erteg..... aft d’åndar alle di åndarn laüt.

Zèrte vert iz gest ginùmma håm liachtege oang un baiza haut zo muna z’soina pezzar baz di åndarn.

Vor vil zait di månnen vodar gåntzan bèlt, håm gimunt z’soina ertegar, sterchar un fürbatar baz di baibar. Biavl vert habar gilüsant aftn teledjornàl odar gilest afti libadar vo stòrdja vo laüt boda töatn di åndarn lai umbrómm da petn nètt in gilàichege Gottarhéar? Berda gloabet in an åndarn Gottarhéar iz sichar znichtar baz biar!

Rebar njånka von sèllnen bodase drossan lai umbrómm da haltn vor åndre squadre boda spil in palù. Fin vor bintsche djar perfìn di sèllnen boda håm ginützt da tschenk hånt un nètt da rècht soin khennt ågischauget letz.

’Z mage vürkhemmen zo vennase inn tortemìtt pitt laüt boda soin sichar z’soina güatar baz du umbrómm du pist a pizzle åndarst baz se. Furse doi haut iz nètt gilàich azpe da sèll vo alln in åndarn, furse khisto vodar åndar sait vodar bèlt, furse pisto tschenkhes... furse redesto an åndra zung.

Asó iz auzgivallt vor vünfhundart djar vor alle di laüt boda håm giredet azpe biar da afti hoachan pön von Simm Kamoündar un in di Teldar von Draitza Kamoündar, asó azpe in Laimtal, in Prånttal, Ronkoutal vo Ala, Posen, Pasubioteldar....

In Taütschlånt dar Lutero hatt gimacht bortn di “Protestént” un allz in an stroach in Beleschlånt allz daz sèll boda hatt eppaz gihatt zo tüana pinn taütsch iz khennt ågischauget letz. Zo maga “stian in patze” vil von sèllnen boda håm giredet azpe biar, mearar baz 10.000 laüt, håm gimocht åhevan zo reda belesch un an lestn saibar übarlebet biar un bintsche åndre.

Sichar biar sèlbart o mochan hèrta schaungbolau nètt zo muna z’soina pezzar baz alle di åndarn.

Rodolfo