Vor a par bochan izta khent givuntet a bomba von zboate bèltkriage, untar earde, attavorå moin haus ka Poatzan.

Di arbatar soin gest nå z’arbata nå in tum von bazzar un, benn sa soin gest nå zo skavàra untar earde pittar ruspa, håmsa tokàrt attnan tòkko aisan. Asó håmsa gischauget bazzez iz, un iz gest an alta bomba, gidjukht pinn aroplò von ameriké durånte in zboate bèltkriage. Di bomba hatt gisbert 225 kg un hatt gihatt 150 kg vo tritòlo.

In tage dòpo azze iz khent givuntet, soinda subito girift di militér un håm gispèrrt in bege. Sa soi gest sèmm tage un nacht zo sorvegliàra azta niamat gea in di zòna vo dar bomba.

Vor mi un di sèllnen boda lem in moi haus iz gest a problèma gian inn un auz von haus, umbrómm ma hatt hèrta gimocht paitn azta a militàr hatte gimacht auzpasàrn.

Zo boróata zo disinneskàra di bomba di militér håm augimacht a groaza maur pitt sånt, vo zirka 900 mètre kube, hoach 5 mètre un bait 17 mètre.

All’inizio hebatnsa giböllt spostàrn di bomba zo disinneskàrase attna n’åndra sait, ma visto ke ’z soinda auzkhent complicazioni, håmsa detzìdart zo disinneskàrase da bo se iz gest un dòpo zo machase brillàrn in a cava bait vort 40 km vo Poatzan.

Dar disinnésko hatt givuntet statt an sunta 20 von otóbre. Da gåntz statt hattze gimocht fermàrn vor ettlane urn umbrómm l’esplosione vo dar bomba hebat gimak machan groaze problèmi, ånka umbrómm vor a par djar in Taütschlånt zo disinneskàra a söttana bomba soinda gisprunk paràrdja drai artifitzìarn.

Di statt iz khent dividàrt in roata zòna un in gela zòna. In da roat soinda residenti viartausankh laüt (i o). Dise abitàrn in an raggio vo 500 mètre vo dar bomba un håm gimocht evaquàrn entro di 8.30, benn da iz khent vortginump ’z liacht, zo permèttra in artifitzìarn åzoheva di arbatn zo disinneskàra di bomba. In da gel zòna soinda alle di haüsar in raggio vo 1.800 mètre. Di laüt boda soin in dise haüsar håm gimocht stian inn in haus un bait vort von vestadarn.

Oltre ditza soinda khent gispèrrt di autobån un di trène soin gistånt vest fin azta iz gest verte allz.

Dòpo zboa urn per fortuna di artifitzìarn håm disinneskàrt di bomba un di 11.45 iz gest allz verte, di laüt soin gikheart bidrùmm in di haüsar un alle soin gest kontént. Est steata solo zo spèrra zuar in bege zo putza allz un zo tüana offe bidar in bege, boda hatt provokàrt nètt bintsche problèmi in di lestn bochan pinn traffico in di statt. Sperarbar azta vor a långa zait neméar vürkhemm asó eppaz.

An gruaz, Samuel Pedrazza