Chisc dis passé na delegazion de la mendranzes linguistiches del Trentin é jita ti Paìjes Bascs per cognoscer e studièr i projec strategics e l sistem de valutazion de la politica linguistica che vegn metui a jir da chesta comunanza che vif daìte dai confins de la Spagna, a nord.

La delegazion tolea ite la responsabola di Servijes linguistics del Comun General de Fascia, Sabrina Rasom, e i trei componenc de l’Autorità per la mendranzes linguistiches de la Provinzia de Trent: l president Dario Pallaoro e la avocates Luciana Rasom e Giada Nicolussi, respetivamenter fascèna e cimbra de naa.

L’obietif de chest viac l’era de cognoscer l sistem de valutazion di programes strategics metui en esser da la Deputaciòn Bizkaia en cont de la normalisazion del basch. En particolèr l’Autorità per la mendranzes linguistiches - istituzion perveduda da la lege de politica linguistica de la Provinzia de Trent del 2008 - volea veder coche veegn portà inant da autra mendranzes, che à na esperienza più longia te chest setor, l’encèria de soravardèr la dreta atuazion de la normativa en cont de stravardament e promozion de la mendranzes linguistiches e de controlèr la doura de la ressorses finanzièles per la politica linguistica e la fazion di intervenc e di projec metui en esser.

L’Assessora al lengaz, cultura e sport de Bizkaia, Lorea Bilbao, con si sorastanc e colaboradores, ge à portà dant ai ghesć la strutura de sie partiment, la competenzes e la normatives en referiment al stravardament del basch, i struments de atuazion di projec sul teritorie, la linies prioritères e i projec strategics per l basch, e soraldut l sistem de valutazion di pians de politica linguistica.

L viac à didà a entener miec coche la competenzes de l’Autorità per la Mendranzes podessa vegnir metudes en doura a na vida concreta, strategica e de fazion e cotant che l’é emportant che chi che se cruzia del setor del lengaz i laore dessema.